مصيف السنة دى من غير ولا كيلو زيادة

مصيف يعنى طعمية سخنة، فرسكا، اييس كريم، فطير، زلابية، وجبات سريعة و مشروبات غازية او #اول_انكلوسيف و يبقى عليه العوض ضاعت #فورمة_الساحل

“محدش يقولى اعمل ريجيم كمان في المصيف“

من غبر ريجيم شوية أفكار بسيطة نقدر نستمتع بالمصيف من غير ولا كيلو زيادة

– اتحكم في فطارك:

الفطار مبيبقاش فيه مغريات عنيفة زى الوجبات التانية و غالبا بيكون في البيت و حتى لو في فندق ف الاختيارات الصحية موجودة، حاولوا يكون فطار مشبع فيه كمية كبيرة من البروتين و الالياف و يا ريت لو فطرتوا من غير عيش (بيض + فول + خضروات مثلا)

– وجبات بينية صحية:

غالبا حتجوع على البحر او و انت بتتفسح ف اعمل حسابك و خلى معاك السناك بتاعتك اللى المفروض متزدش عن 120- 150 كالورى “فاكهة، بسكويت مملح، ملو قبضة يد مكسرات نية، فشار، رقائق ذرة، بقسماط

– 1000 خطوة

امشى على الأقل 1000 خطوة كل يوم

– متحرمش نفسك

كل وجبة حرة في اليوم او خد وجبة بينية فيها حاجة حلوة نفسك فيها

كل باعتدال الاكل مش حيخلص في وجبة تانية بكرة

لو نازل بوفيه مفتوح حاول تاكل تفاحة كبيرة و انت رايح حتشبعك شوية

– الوجبات الرئيسية

التركيز في نوعية الأكل مش بس كميته

الابتعاد عن المقليات و الدهون قدر المستطاع

التركيز مع السعرات المستخبية في صوص اللحوم و المكرونة، تتبيلة السلطات، المايونيز، التومية و الكاتشاب

يجب أن تترك بين الوجبة والأخرى 4 – 6 ساعات

– المياه

اما بنعطش بنشرب مياه مش مشروبات غازية، مش عصاير ولا فرابيه كمية السكريات في المشروبات دى كفيلة انها تدمر اى نظام غذائى

ممكن ننكهة المياه بليمون او شرايح فاكهة او نشرب مشروبات غازية دايت او شاى مثلج من غير سكر

– النوم

على الأقل 7 ساعات بيزود معدل الحرق

– الحق نفسك

لو في يوم عك اوى متأنبش ضميرك الحق نفسك و صوم بعد اخر وجبة من 14 – 16 ساعة (ممكن تشربوا اى حاجة خالية من السعرات شاى، قهوة بدون لبن و بدون سكر)

كلوا بوعى، اتمشوا، اشربوا مياه، كلوا خضار و فاكهة و الحقوا نفسكم بعد العك و انبسطوا من غير ولا كيلو زيادة